Mroiva: Nelson Sauvin & Motueka

Лінейка Mroiva для нас і аматараў нашага піва вельмі хутка стала адной з улюбёных. Нашыя сэсіённыя NEIPA атрымліваюцца вельмі лёгкімі, але маюць усе выразныя асаблівасці стылю: непраглядна-жоўты колер, насычаны арамат з трапічным профілем і прыемны хмелевы смак без залішняй горычы. У новым піве мы выкарысталі два акіянічныя гатункі хмелю — Nelson Sauvin і Motueka. Абодва маюць цікавую асаблівасць: яны прыўносяць у піва адценні белага віна. Але кожны з іх мае і свае ўласныя характарыстыкі, якія разам робяць пах і смак піва яшчэ больш цікавым і складаным. У выніку піва атрымала сакавіты профіль з ягаднымі і кветкавымі адценнямі, профілем вінаграду і агрэсту, а таксама тонамі цытрусавай і костачкавай садавіны.