Maladzik Blend #01

Адным з найбольш важных і цікавых накірункаў нашай дзейнасці з’яўляюцца дзікія і вытрыманыя ў бондах гатункі. Мы ўжо прэзентавалі такое піва, а цяпер запускаем адмысловую лінейку. У межах серыі, якая атрымала назву Maladzik, будуць выпускацца спецыялізаваныя блэнды.

У дэбютным мы выкарысталі малады сэзон, у які былі дададзеныя першыя вясновыя дзьмухаўцы — сакавітыя, духмяныя і поўныя мядовага пылку. Яны былі сабраныя ў чыстым полі ўдалечыні ад дарог і гарадскога жыцця і перадалі ў піва свой салодкі кветкавы пах. Гэтае піва было змяшанае з уайлд-элем, які доўга выспяваў у дубовай бондзе. Вынікам гэтага блэнду стала складанае і шыпучае піва, у якім спалучаецца сухі і кіслы профіль вытрыманага дзікага элю і гарэзлівы смак кветкавага сэзону.