Dym: Višnia

У гэтыя цёплыя дні мы зноў звярнуліся да нямецкага стылю піва ліхтэнхайнер. Гэта светлае, лёгкае і кіслае піва, якое робіцца з выкарыстаннем соладу, сушанага ў дрывяной пячы. У новым піве ў лінейцы Dym мы таксама выкарысталі солад, які сушыцца на торфе — ён дадаў яшчэ больш вэнджаных адценняў піву. Падчас другаснага браджэння мы ўнеслі вялікую партыю кіслай вішні. Апроч таго, што яна змяніла колер піва, зрабіўшы яго кармінава-рубінавым, вішня прыўнесла характэрныя даўкія ягадныя ноты ў смаку. У выніку атрымалася вельмі асвяжальнае піва з выразным кісла-вэнджаным профілем з тонамі вішні. Каб арамат і смак піва максімальна раскрыліся, яму варта даць «падыхаць» — для гэтага дазвольце піву пастаяць у келіху хвілін 10 перад спажываннем.