Zmrok: Kakosavy

Чарговы імперскі стаўт у серыі Zmrok мы вырашылі зрабіць у карыбскім стылі. Спачатку мы зварылі шчыльнае сусла з гіганцкай дозай чорнага соладу, потым замачылі дубовую шчапу ў роме, добра падсмажылі какосавую стружку, і дадалі гэты пірацкі кактэйль на другаснае браджэнне. Какос прыўнёс ванільныя і цукеркавыя адценні ў паху і алеістую структуру, а сумесная праца шчапы, хмелю і чорнага соладу зрабіла піва сухім і горкім — у лепшых традыцыях старой школы імперскіх стаўтаў. Шукайце ў келіху райскую асалоду і кавалкі сапраўднай стружкі.