Fresco: Basilico E Sale

А вось гэты гатунак дакладна дапаможа нам нарэшце сустрэць сапраўдную вясну! Калі шчыра, ідэя зрабіць лагер з базілікам у нас узнікла вельмі даўно, але ж чамусьці заўсёды адкладалася на потым. Усё змянілася, калі размова ў нашым бары пра італьянскія лагеры з дататкам марской солі зноў разварушыла гэтыя вар’яцкія думкі, і мы вырашылі, што калі не гэтым разам – то ўжо ніколі! Гэты пілснер у італьянскім стылі мы зварылі з беларускім варыянтам чэшскага хмелю Saaz, а потым гэты ж самы хмель дадалі і на сухое ахмяленне. Відавочна, не спыніліся і далей вытрымалі наш пілс на свежым эфіопскім базіліку (вы нават не ўяўляеце, якімі водарамі быў напоўнены ў той дзень бровар). Пасля гэтага вельмі ашчадна дадалі марской солі, каб падкрэсліць хрусткі смак нашага Fresco і не ператварыць яго ў салёны гозэ. Ну і, як заўсёды, надзейны штам дрожджаў і доўгая вытрымка пры нізкім тэмпературах зрабілі ўсё астатняе. Fresco – гэта сапраўдны пілс са смакам і водарам цёплага марскога ветру на італьянскім пляжы. Saluti!