Pilsner: Nord

З надыходам больш халаджавай пары году ў нашым лагерным падарожжы мы рушым на поўнач, да сцюдзёных балтыйскіх узбярэжжаў Германіі. Нешта таямнічае ёсць у той вадзе, у тым клімаце, у тых людзях, што робіць гэтыя паўночныя пілсы такімі яскравымі, горкімі, хрусткімі і выразна мінеральнымі. У нашай варыяцыі гэтага цікавага гатунку разам са звыклым сушаным хмелем мы скарысталі нямецкі экстракт хмелю Magnum, каб дадаць у гэты пілс яшчэ больш чыстай, выразнай гаркаты без залішніх смакаў і араматаў зялёнай травы. Класічная доўгая вытрымка, надзейны нямецкі штам дражджэй і арыгінальная камбінацыя гатункаў хмелю ствараюць стрыманы, але прыгожы напой з араматамі дзікіх лугоў, сакавітай лімоннай цэдры і саланаватай марской вады. Zum Wohl!