Saĺsa: White Habanero

Нашая выключная лінейка вострых, сакавітых, незвычайных таматных гозэ напрыканцы году папоўнілася асаблівым новым гатункам. Доўгачаканая калабарацыя з нашым таленавітым сябрам Дзмітрыем Герасімавым, чараўніком пякучых смакаў і ўладаром экзатычных суперхотаў. Спецыяльна для нас ён узгадаваў некалькі кустоў рэдкіх белых хабанэра — менш пякучых, чым звычайныя хабанэра, звышараматных, з водарам сапраўдных трапічных фруктаў. Мы дадалі акуратна падрыхтаваны мэш з ферментаваных перцаў да нашай звычайнай таматнай базы, але вырашылі зрабіць яе больш стрыманай, каб дазволіць магічным, непаўторным і пяшчотным смакам белых хабанэра ззяць скрозь хвалю ўмамі. У цёплых сяброўскіх калабарацыях нараджаецца сапраўдная белая магія!