Kava: Kenya Endebess

Мы пачынаем новую серыю — Kava. Як зразумела з назвы, гэта будзе піва з рознымі гатункамі кавы, базай для якога стане імперскі стаўт. Першы гатунак — Kenya Endebess. Гэта кенійская кава з рэгіёну Транс-Нзоя, вырашчаная на ферме Эндэбес на вышыні каля двух тысячаў метраў. Яна адносіцца да мікра-лотаў, г.зн. сабраная з адной дзялянкі зямлі, і прадаецца абмежаваным аб’ёмам. Гэты гатунак адрозніваецца яскравым смакам з ноткамі шакаладу, ягадаў, сухафруктаў і лёгкай вастрынёю. Усе гэтыя адценні кава перадала ў піва. Яны выдатна спалучаюцца з выразнай смажанай асновай, мяккім сагравальным целам і лёгкай гарчынкай у паслясмаку.